Худалдан авах

Д.Нацагдорж

Д.Нацагдоржийн орчуулга

2026 оны хавар шинэ номууд

БАРУУН: 22-н товчоо, Орбитын эцэс, Зүүн
салааны эцэс
ХОЙД: Шадивлан, Сэлбэр ресорт
ЗҮҮН: Гачуурт
УРД: Өлзийт хороолол


Холын бүс

БАРУУН: Тахилт, Зүүн салаа
ХОЙД: Дамбадаржаа, Бэлх
ЗҮҮН: Амгалан, Хужирбулан, Шар хадны
эцэс
УРД: Буянт-Ухаа, Зайсан толгой

Энгийн бүс

Чимээ паблишн

Намрын тунгалаг усны бичиглэл

Яруу найрагч, зохиолч М. Уянсүхийн "Намрын тунгалаг усны бичиглэл" хэмээх содон нэртэй түүвэр нь зохиогчийн хувьд мөнхийн сэдэв нь болсон намрыг илүү гүнзгий мэдэрч, илүү тод шүлэглэхийг эрмэлзсэн онцлогтой.
Ерөөс намрын улирал нь яруу найрагчдад онцгой улирал байдагчлан М. Уянсүх ч мөн адил намраар дамжин орчлонгийн жам ёсыг эргэцүүлдэг нь түүний шүлгүүдээс мэдрэгддэг. Ялангуяа намар, зам хоёр нь найрагчийн дотоод ертөнцийн салшгүй хэсэг, дотоод бясалгалын амгаланг бүрдүүлэгч орон зай хийгээд цаг хугацааны дүрслэл байсаар ирсэнийг эл түүврээс харж болно.

Д.Нацагдоржийн орчуулга АГЛАГЧ тэргүүт бусад зохиол

Дашдоржийн Нацагдоржийн мэндэлсний 120 жилийн ойд зориулж, түүний орчуулгын сан хөмрөгөөс урьд өмнө нь энгийн уншигчдад төдийлөн хүрч байгаагүй бүтээлүүдийг сонгон эмхэтгэв. Орчин цагийн уран зохиолын хэл найруулгыг бий болгосон хэмээх түүний яруу найруулгыг таашаан мэдье гэж хүссэн хэн бүгдэд зориулав. 

ТАНЫ АМЬДРАЛЫГ ӨӨРЧЛӨХ НОМ “Ад үзэгдэх зориг” бол Фройд, Юнг нартай эн зэрэгцэж “Сэтгэл судлалын гурван том магнат” хэмээн алдаршсан Альфред Адлерын үзэл санаа буюу Адлерын сэтгэл судлалыг философич ба идэр залуу хоёрын харилцан яриа хэлбэрээр тайлбарлан эмхэтгэсэн бүтээл юм.Энэ ном өнгөрсний шарх, бусдын хүлээлтээс ангижирч, аз жаргал, амар амгаланг олох хүч чадал хүн бүрийн дотор оршдогийг харуулж, өөрийгөө өршөөж хайрлах, сэтгэлээ цэгцлэх, хамгийн гол нь хүн хоорондын харилцаанд бүдэрч, туйлдалгүй амьдрах ухааныг уншигчдад өгнө.Дэлхий даяар сая сая хүн “Ад үзэгдэх зориг”-ийг уншиж, өгөөжийг нь хүртжээ. Одоо таны ээлж. Зохиогч: Кишими, Ичиро, Кога Фүмитакэ Орчуулагч: ТОМё БОДёРедактор: Д.Түмэн-Өлзий, Б.Болор-ЭрдэнэХавтас: Н.Бямбацогт 140х200 мм / 236 нүүр

Ад үзэгдэх зориг

Эл зохиолыг бичих сэдэл анх төрсөн он цаг гэвэл их эрт. Гагцхүү яаран буулгаж үл түвдэн, дотроо удтал эргэцүүлэн бодож, заримыг ноорог байдлаар тэмдэглэн, заримыг нь тархиндаа хураан нөөж явсны эцэст 2017 оны дундуур одоо л цэгцлэн буулгах цаг ирэв хэмээн сэтгэсэн санагдана. Тийнхүү таг сууж, сэдэл санаануудаа буулгаж эхлэхдээ томоохон хэмжээний энэ мэт туурвилд хүч сорихоор шийдсэн анхны тохиол тул туршлага дулим, гагцхүү өөрийн дотоод дуу хоолойг сонсож, түүнд итгэж, түүнийг дагаж байснаа тухайлан нурших нь илүүц биз ээ. Нэг насны амьдрал гэдэг хэдий бодит үйл явц мөн боловч би түүнийг үргэлж хийсвэр сэтгэхүйд ургуулан, гэнэхэн янзаар төсөөлсөөр иржээ. Тэрхүү хийсвэр төсөөлөл намайг оршин буй ахуйгаас ангижирч онхи өөр орон зайд аялахыг ятган, тэр ятгалгад би мөн л гэнэхэн автсаар ирсэн байна. Тиймээс эл зохиол үнэн гэхэд хэцүү худал, худал гэхэд бэрх үнэн билээ.Зохиолоо би “Аварга мод” гэж нэрлэсэн нь санамсаргүй хэрэг бус аа! Миний хүүхэд ахуй нас цаст өндөр уулсын дагшин хязгаар Мухар Улиастайн аманд өнгөрсөн юм. Тэнд манайх жил бүр гарч зусдаг асан агаад (Увс аймгийн “Хархираа” амралт) миний ой тойнд арилшгүй тод дурсамж үлдээсэн хоёр мод байдаг байлаа. Нэг нь Онгоц мод, нөгөө нь Тахир харгай. Мухар Улиастайн голын өндөр эрэг дээр одоо ч байдаг Тахир харгай руу би багадаа нэг найзтайгаа хоёул долоон том хадаас зоож билээ. Чөтгөртэй мод руу чөтгөрийнх нь тоогоор хадаас зоовол (тэр үед томчуул Тахир харгайг долоон цагаан чөтгөртэй гэж хүүхэд биднийг айлгадаг асан) мод үхэж, чөтгөр нь тонилдог гэж настангуудын ярианаас сэм сонссон болоод тэр. Гэвч, намар болоход Тахир харгай бусад моддоос түрүүлэн үзүүрээсээ шарлаж эхлэхэд очиж үзээд, шаасан хадаасны нүхнүүдээс өтгөн хүрэн давирхай нулимс цувах шиг гоожин буйг хараад өрөвдөн, хадааснуудаа бүгдийг буцаан сугалж авсан юм. Мод үхсэнээс чөтгөрүүдтэйгээ хамт байж л байг гэж бодсондоо тэр. Харин нөгөө нэг мод буюу Онгоц мод руу бид авирч тоглодог байлаа. Онгоц мод бидэндээ л аварга том мод байсан юм. Зуслангийн өмнөд дэнж дээр байдаг тэр мод бусдаасаа өндөр гоолиг. Эгц шулуухан. Бидний тэвэрт багтамгүй бүдүүн. Онгоц модны салаалсан бахим мөчрүүдийг дамжин дээш авирч оройд нь гарсан аль ч хүүхэд нарийн үзүүрт нь хүрч тас тэврэн наалдаад, биеэ хөдөлгөн модны оройг ганхуулж, түүнийгээ даган найгахдаа онгоцонд суугаад нисэж байна гэж төсөөлнө. Тэрхүү Онгоц модны ис оройд уулын хүйтэн салхи чих дүлийртэл шуугин исгэрч, үнэхээр л агаарт дүүлэн нисэж явах мэт санагддаг асан тэр өдрүүдээс хойш нэгэнт 30 гаруй жил улиран оджээ. Онгоц мод одоо байхгүй. Түүнийг аль эрт хэн нэгэн хөрөөдөж аваад оджээ. Гэсэн хэдий ч тэр мод миний дурсамжаас арчигдсангүй. Харин ч улам бүр тодорсоор л. Яагаад гэхээр, Онгоц мод л намайг анх тэнгэрт хүртэл өргөсөн билээ. Онгоц мод руу авирсан зам бол миний тэнгэрт тэмүүлсэн, тийшээ өгссөн анхны зам. Бодитой зам. Тэр замаас миний хийсвэр төсөөлөл эхэлсэн гэж боддог. Хийсвэр төсөөллөө дагаад би хаа хүртэл явахаа мэдэхгүй. Гэлээ ч гэсэн надад түүнээс өөр замгүй.Яг одоо миний өмнө айдас, эргэлзээ дагуулсан дуусашгүй урт он жилүүд хэвээр байгааг би мэднэ!!! Миний ард бас үүх түүх, дурсамж санагалзал, эгээрэл мартагнал дүүрэн тоо томшгүй он жилүүд л байгаа. Ард үлдсэн он жилүүдийг эргэж харах гэхээсээ илүү өөдөөс угтан тосох тэр он жилүүдтэй уулзах гэж бид яардаг. Тийм болохоор л амьдрал биднийг дагаад, бидэнтэй цуг үргэлж яарч, догдолж байдаг билээ. “Амьдралд зөвхөн амьдралын тухай бодлууд байдаг шиг хүмүүст зөвхөн хүмүүсийн тухай бодлууд байдаг” хэмээн би эл номондоо тэмдэглэсэн бий. Хэрэв тийм ахул энэ ертөнц өөрөө ердөө орооцолдож зангирсан бодлуудын цогц нийлбэр болж таарах агаад миний төсөөллийн өтгөн манан дунд нуугдагч (хэзээ ч бүрэн ил гарч ирдэггүй) тэдгээр бодлууд бүгд нэг үр, нэг үндэснээс эхлэн, улмаар олон арван зүгтээ мөчир салаа үүсгэж, түүнээсээ түгэн дэлгэрч, арвижин баяжиж ирсэн нь лавтай. Тэр бүхний хамгийн дээд илрэл нь миний бодлоор хүмүүний оюун санааг дэвсгэрлэгч АВАРГА МОД мөн юм.Тэрхүү АВАРГА МОД-ыг үл үзэгдэгч бурхад гагцхүү хүмүүст зориулж, амьдралын бэлгэдэл болгон бүтээжээ. Тиймээс АВАРГА МОД бол БҮГДИЙН ЖИШЭЭ мод. Тэр бол миний дурсамжийн Онгоц мод, Тахир харгай, бөө тэнгэрийн Онгодын мод, Ургийн болон Танин мэдэхүйн мод, жир амьдрал утгагүйг таниад баян тансаг ордноо орхин даяанчилсан идэр ханхүү Гуатама буюу энэрэнгүй их Будда бээр сүүдэрт нь сууж бясалган мөнхийн хутаг олсон домогтой эрхэмсэг Бодь мод (тэрхүү Бодь модны навчин дээр Бурхан багшийн дүр өөрөө тодрон гарч ирдэг гэлцдэг), Адам, Ева хоёр үр жимснээс нь тасдаж идээд хөөгдсөн Ээдэн цэцэрлэгийн хориотой мод... гэхчлэн, ер ямар ч мод байж болох хэдий ч уг гарваль нь миний эл зохиолд өгүүлэн буй АВАРГА МОД мөн юм. Тийнхүү би бээр олон зүйлийг нуршихыг тэвчин сэрэмжилж, таны өмнө номын хуудсаа дэлгэсүгэй хэмээн гүнээ хүндэтгэж, мэхийн ёсолсон тэр өдөр өө! Зохиогч бээр,2019 оны 04-р сарын 27-ны өдөр ***Зохиолч: М.УЯНСҮХРедактор: Г.БямбажавХавтасны зураач, дизайнер: Б.Төгсжаргал ISBN 978-9919-9823-7-9 143х205 мм / 466 нүүр

Аварга мод

<a href="https://heyzine.com/flip-book/8a9b6a41f3.html" rel="noopener noreferrer" target="_blank">Номын хэсгээс унших</a> Залуу яруу найрагч, эмч Тө.Бямбасүрэнгийн анхны хүүрнэл зохиол."Үхэл гэдэг үг бидэнд дэндүү ойр, харин тэдэнд бол од эрхэс шиг хол.”Сэхээний тасагт хэдхэн мөчийн дотор хүний хувь заяа шийдэгдэнэ.Амьдрал, үхлийн зааг дээр хүн өөрийгөө ч, бусдыг ч шинээр таньж эхэлнэ.Төв аймгийн Зуунмод хотын Нэгдсэн эмнэлгийн Эрчимт эмчилгээний тасагт өрнөх түүх.Үхлийн тухай эргэцүүлэл, өнчрөл хагацал, амь аврах, амьд үлдэхийн төлөөх тэмцэл. Зохиолч: Тө.БЯМБАСҮРЭНТехник редактор: Д.ЧимгээХавтас: Д.Төмөрхуяг, Н.Бямбацогт 130х190 мм / 178 нүүр

Улам дөжрөм, тэгээд нам гүм

3 жилийн дараа философичийг дахин зорьж ирсэн залуугийн цочирдом наминчлал Тэрээр Адлерын сургаалыг хаях эсэхээ шийдэж ядан, шаналгаат асуултынхаа хариуг хайсаар иржээ. Адлерын сэтгэл судлалыг "Амьдрал дээр хэрэгждэггүй, хоосон онол" хэмээн үзэх залууд философич "Чи Адлерыг буруугаар ойлгож байна" хэмээн хариулна.Адлерын хэлсэн, хүн бүр аз жаргалтай амьдрахын тулд зайлшгүй нүүр тулах "Амьдралын хамгийн том сонголт" гэж чухам юу байв?Таны амьдралыг үндсээр нь өөрчлөх философийн мэтгэлцээн дахин эхэллээ! Зохиогч: Кишими, Ичиро, Кога Фүмитакэ Орчуулагч: Д.АлтанцэцэгРедактор: Ц.ДэлгэрмааХавтас: Н.Бямбацогт 140х200 мм / 236 нүүр

Жаргалтай болох зориг

"Ад үзэгдэх зориг" номын үргэлжлэл

Ф.М.Достоевскийгийн энэхүү тууж гол дүрийн би өгүүлэгчийн эхнэрийн үхлээр эхэлнэ. Үргэлжлэл нь тэр аяараа магадгүй наманчлал, тэрхүү наманчлалаас үүдсэн дүрийн дотоод монолог хэмээн тодорхойлж болохуйц өгүүлэмжээр баялаг. Уг бүтээлийг амиа хорлохын утга учир, хүн чухам яагаад амиа хорлоод буйг ухаж ойлгох гэж бичсэн гэж үздэг. Юуны учир тэр эхнэр амиа егүүтгэв? Чухам энэ л асуултын хариултыг олох гэж нөхөр нь өөрийгөө шүүнэ. Уг бүтээлийг Достоевскийгийн туужуудын гүн санаа, хурц үйл явдал, дүрийнх нь дотоод монологийг тодорхойлж чадах хамгийн чухал бүтээл гэж үздэг бөгөөд олон хэлээр орчуулагдаж, кино, жүжиг хүртэл тавигдсан байдаг.&nbsp; Зохиолч: Ф.М.Достоевский Орчуулагч: Б.МинжбадамгаравХавтасны зураг дизайн: Э.МишээлХэвлэлийн газрын редактор: Д.ЧимгээЭх бэлтгэл: Д.Цэрэндулам ISBN: 978-9919-9014-6-2 115х180 мм / 83 нүүр

Ноомой

Яруу найрагч М.Уянсүхийн энэ түүвэр нь намраас үүдсэн гуниг, ганцаардлаар дамжуулан ертөнцийн жам, хүний сэтгэлийн оршихуйг эргэцүүлсэн шүлгүүдээс бүрдсэн бөгөөд залуусын дунд эрэлттэй тул 2014 онд цөөн тоогоор хэвлэгдсэн уг түүврийг ЧИМЭЭ хэвлэлийн газар дахин хэвлэжээ.Ганцаардлаар зам хийж, үнэний эрэлд бэдэрсэн шүлгүүдээс нь үе үеийн мэргэдийн дэвшүүлсэн мөнхийн санааг зохиогч өөрийнхөөрөө тайлахаар эрмэлзсэнийг мэдэрч болно. Ер нь М. Уянсүхийн шүлэг, хүүрнэл аль нь ч мөнх бусын эргэцүүлэл дүүрэн байдаг онцлогтой. Мөн тэр нь тайлшгүй нууцыг тэмтэрч, хүршгүй алсад тэмүүлж байдаг. Зохиолч: М.УянсүхРедактор: Г.БямбажавЗураач, дизайнер: Б.Төгсжаргал 188 x 138 мм / 168 нүүр

Есдүгээр сар ба энэ зам

Салийм Синай бол Энэтхэг улс тусгаар тогтнолоо зарлан тунхаглах яг тэр мөчид буюу шөнө дунд мэндэлсэн онцгой хүү. Түүнтэй хамт нэг агшинд төрсөн “шөнө дундын хүүхдүүд” бүгд ер бусын чадвартай. Харин Салиймд тэдгээр бүх хүүхдийг холбох оюун санааны нууцлаг хүч заяасан байдаг. Түүнийг төрөхөд аймшигтай холион бантан болж, амьдрал нь хэн ч төсөөлшгүй, гэнэтийн эргэлтүүдээр дүүрч орхино. Жаргал, зовлонгийн шуурга дунд өсөж өндийхдөө өөрийн авьяас чадварын аймшигт үр дагаврыг ухаарах болно. Учир нь түүний хувь тавилан эх орныхоо хувь заяатай салшгүй холбогдсон бөгөөд хийсэн үйлдэл бүхэн нь дөнгөж тусгаар тогтносон Энэтхэг улсын түүхэнд тусгалаа олно. Энэ бол агуу суу билиг... бас дааж давшгүй ачаа. “Энэ эрин үед англи хэлт ертөнцөөс төрөн гарсан хамгийн чухал, нөлөө бүхий номуудын нэг.”— New York Review of Books“Салман Рушди бол аугаа зохиолч. Тэрээр хязгааргүй уран төсөөлөлтэй, хурц, шогч ухаантай нэгэн. Хэлийг тэр эрч хүчтэйгээр, ямар ч хориг саадгүйгээр эзэмддэг.”— IndependentЭнэтхэгийн уран зохиолын газрын зургийг шинээр зурсан бүтээл. “Шөнө дундын хүүхдүүд” өөрийн дуу хоолойгоо олж буй тив шиг сонсогддог.— New York Times Зохиолч: Салман РушдиАнгли хэлнээс орчуулсан: Г.СугиррагчааХавтасны зураг: Б.Төрмөнх 210x148 мм / 549 нүүр

Шөнө дундын хүүхдүүд

Яруу найрагч, зохиолч М.Уянсүхийн “Хонхот хүүхэлдэй” роман нь ХХ зууны 70-аад оноос ХХI зууны эхэн үе хүртэлх цаг хугацааг хамарч, тухайн үеийн монголчуудын аж амьдралыг тодорхой дүрслэн үзүүлжээ. Зохиолын гол дүрийн балчир насны дурсамжаар өмнөх нийгмийн амьдралыг дам үзүүлсэн бол залуу насны амьдралаар нь 90-ээд оны нийгмийн шилжилтийн явцыг нэн хурцаар нээн харуулсан нь сонирхол татна. Тэрчлэн хувь хүний сэтгэлгээний өсөлт, оюун санааны чөлөөт эрэл хайгуул, дотоод сэтгэлийн бүтээлч хувирал өөрчлөлтүүдийг амьдрахуйн жам, танин мэдэхүйн зам, ертөнцийн тайлагдашгүй нууцуудтай нягт холбон үзүүлсэн уг зохиол нь М.Уянсүхийн дөрөв дэх роман бөгөөд эл зохиолоо зохиогч өөрөө “Аварга мод”, “Оройн дээд” романуудаас үйл явдал, дүрүүдийн хувьд өөр, бие даасан шинж бүхий боловч далд сэжимээр холбоотой хэмээн үзэж буй аж. Тиймээс эл гурван романыг гурамсан роман хэмээн дүгнэж болох ажээ.&nbsp;&nbsp;&nbsp;&nbsp;&nbsp;&nbsp;Зохиолч: М.УянсүхРедактор: Г.БямбажавДизайнер, зураач: Б.Төгсжаргал 210х135 мм / 476 нүүр

Хонхот хүүхэлдэй

Детектив уран зохиолын төрөлд дорнын гэх өнгө аясыг гаргаж ирсэн, Японы адал явдалт зохиолын нэрт төлөөлөгч Эдогава Рампогийн "Хүн сандал" түүвэр орчуулагч Д.Дашмөнхийн орчуулгаар дахин хэвлэгдлээ. Эдогава Рампогийн зохиол бүтээл нь хуудас бүрдээ айдас түгшүүр, огиудас зэвүүцэл, санаанд оромгүй эргэлтээр дүүрэн. Магад та үүнийг уншаад өөрийн сандлаас огло харайн босох бий вий. Тус түүвэрт "Хүн сандал", "Авгалдай" зэрэг нийт 9 бүтээл багтжээ. Зохиолч: Эдогава Рампо Орчуулагч: Д.Дашмөнх Хавтас: Д.Төмөрхуяг, Н.Бямбацогт 115х180 мм / 220 нүүр

Хүн сандал

Дэлхий дээрх хамгийн үзэсгэлэнтэй арьсны нууц!Бүх зүйл арьснаас эхэлнэ. Солонгосчууд эрүүл, гэрэлтсэн арьсыг өв тэгш гоо сайхны илэрхийлэл гэж үздэг. Хүсвэл хүн бүр ийм арьстай болох боломжтой. Эдүгээ арьс хамгийн чухал гэх үзэл дэлхий даяар эрчийг авч байна.&nbsp;Арьс арчилгаа, эрүүл амьдралын хэв маягийн талаар үнэ цэнтэй мэдээ мэдээлэл түгээдэг Soko Glam цахим дэлгүүрийн үүсгэн байгуулагч Шарлотт Чо “Арьс арчилгааны бяцхан ном”-доо Солонгосын алдарт 10 алхамт арьс арчилгааны нууцаас задалж, өөгүй, гэрэлтсэн арьстай болох арга ухааныг зааж, үнийн хувьд харилцан адилгүй олон янзын бүтээгдэхүүнээс алийг нь сонгох талаар зөвлөөд зогсохгүй арьс арчилгааны мэргэжилтнүүдтэй хийсэн тусгай ярилцлагуудыг багтаажээ. Энэхүү номыг уншсанаар та орон гэртээ амрангаа арьсаа эрхлүүлэх арга ухааныг мэдэж авахаас гадна Сөүлийн гудамжаар алхаж явдаг сайхан арьстай бүсгүйчүүдийн будаагүй мэт будах аргаас суралцах боломжтой.&nbsp;Шарлоттын арьс арчилгааны мэргэжилтний хувьд олж авсан мэдлэг, туршлага болоод анд найзын хувиар өгч буй элгэмсүү зөвлөмжүүд танд солонгосчуудын гоо сайхны соёлыг ойлгуулаад зогсохгүй өдөр тутмын арьс арчилгаагаа илүү сонирхолтой болгож, өөгүй сайхан арьстай болоход тань туслах нь дамжиггүй.&nbsp;&nbsp;Зохиогч: Шарлот ЧоОрчуулагч: Ж.ШижирРедактор: Б.Сувддулам 210х180 мм / 210 нүүр

Арьс арчилгааны бяцхан ном

2016 онд хэвлэгдсэн “Муурын байшингуудын түүх” түүврийн нэмж, засварласан хоёр дахь хэвлэл. Уг түүврийн өгүүллэг бүрийг нэмж засварлан, шинэчилсэн бөгөөд “Алтан гургалдайн дуу”, “Галзуурал”, “Өнгө зүсгүй газар”, “Танихгүй хүнтэй үг сольсон нь” зэрэг дөрвөн шинэ өгүүллэгийг нэмжээ. Зохиолч: Б.АЛТАНХУЯГХавтасны зураач: Б.Төрмөнх 130х190 мм / 216 нүүр

Муурын байшингуудын түүх

Зохиолч, яруу найрагч М.Уянсүхийн яруу найргийн шинэ түүвэр. Хавтасны зураач: Б.Төгсжаргал ISBN 978-9919-9823-9-3 190х135 мм / 203 нүүр

Тэнгэр улам уудам болоход

100 жилийн БЭСТСЕЛЛЕР Вавилоны хамгийн баян хүн ном анх 1926 онд Америкт гарсан даруйдаа бизнесмен, банкируудын дунд ихэд түгж, улмаар даатгалын компани, банкуудаар дамжин асар олон хувь тараагдаж нийтэд алдаршжээ. Энэхүү бүтээлийг орчин үед хэвлэгдсэн санхүүгийн олон номын эх сурвалж хэмээн үздэг. Бараг 100 жилийн турш дэлхийн дайнууд, эдийн засгийн олон хямралын үед ч уншигдсаар ирсний учир нь өнөө маргаашийг аргацаах арга зальхан бус, мөнгөнд хайрлагдах жинхэнэ ур ухаан, хөдөлмөрийн үнэ цэн, хүн хоорондын харилцааны эв дүйн талаар он цагийн уртад хуучиршгүй үнэнийг бичсэнд оршино. Зохиогч: Жорж С. Клэсон Орчуулагч: Б.ХатантөмөрРедактор: Д.ЧимгээХавтасны дизайн: Н.Бямбацогт ISBN 978-9919-9823-4-8 115х180 мм / 200 нүүр

Вавилоны хамгийн баян хүн

“Хуучин ертөнцийг томьёолсон тэмдэгт үгсийн хураангуй” нь зүүд зөн, ёр бэлгэ, сүнсний ертөнц, домог зүй, хийсвэр сэтгэлгээ холилдсоноороо сюрреализмыг тунхаглаж; хүний сэтгэлгээний язгуур үндэс болсон ид шид, илбэ домын сэтгэлгээтэй холбогдож; ертөнцийн язгуур үндэс, үзэгдэл юмсын цаад мөн чанар руу нэвтэрсэн мета танин мэдэхүйн эргэцүүлэл хийж; санаашрал, зовнил, айдас, ичгүүр, түгшүүр, эмгэнэл, гэмшил, үхлээс айхуй зэрэг хүн төрөлхтний оршихуйн үндсийг авч үзсэн экзистенциалист үзлийг нэвт шингээсэн; сэтгэл зүйн эрэл хайгуул хийсэн, ид шидийн гэмээр далд нууцлаг үгийн увдисыг эзэмдсэн шидэт реализмын гайхамшигтай бүтээл." Зохиолч: М.УЯНСҮХРедактор: Г.БямбажавХавтасны зураач: Б.Төрмөнх ISBN 978-9919-9823-3-1 115х180 мм / 219 нүүр

Хуучин ертөнцийг томьёолсон тэмдэгт үгсийн хураангуй

Хүн төрөлхтнийг мунхруулагч гурван хэтэрхий зардасыг эцэг тэнгэр дууджээ. Илт гажуудсан гурван үнэний замаар замнаж, хүй тасарсан эх дэлхийгээ хөнөөсөн хүн төрөлхтний эмгэнэлт хувь тавилангийн дараа эцэг тэнгэр тэдгээр гурван гэмтнийг зүгээр орхиж тэвчсэнгүй. Эцэг тэнгэрийн өмнө Будда арван естэй сайхан хөвгүүний эрдэнийн гавлаар үйлдсэн аяга сархадтай ирсэн бол хөл нүцгэн Ийсүс Христ уранхай зотон өмсгөл хэдэрч, дөнгөж нахиалсан гурван навчит мөчир тасдан таяг хийжээ. Харин Аллахын нэрээр чалма ороосон Мохаммед хар тамхи нэрсэн урт гаанс барьсан байв. Ингээд эцэг тэнгэр тэдэнд хандаж мөнхийн сургаалт ганц, ганц эшлэл үг хэлэхийг хүсчээ... Зохиолч: М.УЯНСҮХРедактор: Г.БямбажавХавтасны зураач: Б.Төрмөнх ISBN 978-9919-9823-2-4 115х180 мм / 163 нүүр

Мянга хоёр дахь шөнө тохиосон ид шидгүй үлгэрүүд

Үл өгүүлэхүйн тухай өгүүлэх нь хөх тэнгэрийн гүнийг хязгааргүй уудамтай нь хамт дотогш сэтгэх мэт нэн тэчьяадам бөгөөд тэнд бүхүй сарны дүрс ба тэндээс ирэх далд шивнээ миний зүрхнээ эрт урьдын домог ба одоо агч хүмүүсийн тухай сэтгэл дэнслэм агаад нууцлаг шидэт хүүрнэлүүдийг өртөөлүүлж, үл таагдах оньсого мэт ойлгомжгүй зүгт намайг сэм урин ятгах бүлгээ. Хэзээ нэгэн цагт би хаа нэгтээгээс зайлшгүй ирэх ёстой далд зөн агуулсан холын тэр дуудлагыг хүлээхээ мэдсэн бол түүнээс өмнө үхэж үрэгдэх минь яалаа гэх гаслант бодол эрхгүй төрнө... Зохиолч, яруу найрагч М.Уянсүхийн "Аниргүй там" өгүүллэгийн түүврийн шинэ хэвлэл."Аниргүй там", "Шидтэн", "Үл үзэгдэх шат" зэрэг 20 бүтээл багтжээ. Зохиолч: М.УЯНСҮХРедактор: Г.БямбажавХавтасны зураач: Б.Төгсжаргал ISBN 978-9919-9823-0-0115х180 мм / 280 нүүр

Аниргүй там

Уулынхны дунд Айшхигээс огтхон ч эмээж цэрвэдэггүй ганц хүн байсан нь миний ижий. Айшхиг бүр багаасаа мэднэ. Ижий түүнийг дагаж анх аргал түүж сурчээ. Ижийг багад Айшхи чухам нүд дүүрэн сайхан бүсгүй байсан гэдэг. Түүнийг тэгэхэд Айшхи биш, Цээнэ гэдэг байжээ. Уулын цэцэг шиг Цээнэ бүсгүй. Цээнэ бүсгүй ижийг дагуулж уулын хөх аргал түүнэ. Зохиолч: М.УЯНСҮХРедактор: Г.БямбажавХавтасны зураач: Б.Төгсжаргал ISBN 978-9919-9823-1-7 115х180 мм / 328 нүүр

Айшхи

“Шударга ёсны хордлого” бол Японы тархи судлаач Накано Нобүкогийн бичсэн, орчин үеийн нийгмийн сэтгэлзүйн нэгэн эмзэг үзэгдлийг шинжлэх ухааны үүднээс тайлбарласан бүтээл юм.Хүн бусдын оршихуй болоод “буруу”, “шударга бус” үйлдлийг буруутгах, яллаж шийтгэх үедээ таашаал мэдэрдэг мөн чанартай бөгөөд энэ нь бүр донтолт болон хувирч болзошгүй. Зохиогчийн тайлбарласнаар, энэ нь хүний тархины бүтэцтэй холбоотой тул хэн ч “шударга ёсны дон”-д автаж болно.Ковидын үеэр халдвар авсан нэгнийг нийтээрээ гадуурхах үзэгдэл ийм дон хэрхэн илэрч болохыг харуулсан тод жишээ юм. Сошиал медиа өдөр тутмын амьдралын салшгүй хэсэг болсон өнөө цагт энэ дон улам газар авч, хүмүүс өөрийн байр суурийг туйлшруулан хамгаалж, “миний зөв, би л шударга” гэсэн хандлагад гүн автдаг. Өөрөөр хэлбэл сошиал медиа шударга ёсонд донтогсдын хувьд хямд төсөр хэрэгсэл болж хувирчээ. Хамгийн аюултай нь, хөнгөнөөр бичсэн нэг л коммент бусдын сэтгэлд гүн шарх үлдээж, нөхөж баршгүй хор уршиг дагуулж мэднэ.Энэхүү ном нь асуудлыг тайлбарлаад зогсохгүй “шударга ёсны дон” гэх нэр томьёог гаргаж ирэн нийгэмд шинэ өнцөг, шинэ ойлголт дэвшүүлснээрээ онцгой бүтээл юм. Энгийн, ойлгомжтой үгээр бичигдсэн энэ ном уур хилэн, үзэн ядалтын гинжнээс ангижирч, өөрийгөө ч, өрөөл бусдыг ч хордуулахгүйгээр тайван амьдрахыг хүссэн хэн бүхний зайлшгүй унших бүтээл юм. Зохиогч: Накано НобүкоЯпон хэлнээс орчуулсан: Д.Чимгээ, Д.МаралгооРедактор: М.УянсүхХавтасны дизайн: Н.БямбацогтЭх бэлтгэл: И.Дэлгэр 175x115 мм / 192 нүүр